სრულიად საქართველოს კათოლიკოს პატრიარქი მცხეთა თბილისის მთავარეპისკოპოსი და ბიჭვინთისა და ცხუმ აფხაზეთის მიტროპოლიტი უწმინდესი და უნეტარესი ილია II 1933 წლის 4 იანვარს ვლადიკავკაზში გიორგი ღუდუშაური-შიოლაშვილისა და ნატალია კობაიძის მორწმუნე ოჯახში დაიბადა. მომავალი კათოლიკოს-პატრიარქი დაბადებიდან სამ დღეში -  7 იანვარს - ძაუგის ქართულ ეკლესიაში მონათლეს და მეფე ერეკლეს პატივსაცემად, ირაკლი დაარქვეს. უწმინდესმა და უნეტარესმა ილია II -მ  სკოლა ვლადიკავკაზში 1952 წელს  დაამთავრა და სწავლა მოსკოვის სასულიერო სემინარიაში განაგრძო. სემინარიის წარჩინებით დასრულების შემდეგ კი სასულიერო აკადემიის პირველ კურსზე ჩაირიცხა. 1957 წლის 16 აპრილს 24 წლის ასაკში, მე-2 კურსის სტუდენტი თბილისში ბერად აღიკვეცა. მას სახელად ილია ეწოდა. იმავე წლის 18 აპრილს თბილისის სიონის საპატრიარქო ტაძარში ბერი ილია ხელდასხმულ იქნა ბერდიაკვნად, ხოლო 1959 წლის 10 მაისს იგი მღვდელმონაზვნად აკურთხეს. სასულიერო აკადემიის დასრულების შემდგომ კათოლიკოს პატრიარქი სამშობლოში დაბრუნდა და მსახურება ბათუმის საკათედრო ტაძარში განაგრძო. 1960 წელს ის ჯერ იღუმენის, ხოლო 1961 წელს არქიმანდრიტის ხარისხში აიყვანეს. ერთი წლის შემდეგ არქიმანდრიტი ილია  ბათუმ-შემოქმედელ ეპისკოპოსად და  პატრიარქის ქორეპისკოპოსად დაინიშნა. აჭარაში 7 წლიანი მოღვაწეობის შემდგომ მომავალი პატრიარქი 1967 წელს ცხუმ-აფხაზეთის ეპარქიის მღვდელმთავრად გადაიყვანეს. ორი წლის შემდეგ იგი მიტროპოლიტი გახდა. საქართველოს ეკლესიის მეთაურს სოხუმთან მოღვაწეობის 11 წელი აკავშირებს. ის ამავდროულად 1963 წლიდან გახლდათ მცხეთის სასულიერო სემინარიის პირველი რექტორიც. 1977 წელს გარდაიცვალა სრულიად საქართველოს კათოლიკოს-პატრიარქი დავით V (დევდარიანი). 1977 წლის 9 ნოემბერს, წმიდა სინოდის განჩინებით, პატრიარქის მოსაყდრე  ცხუმ-აფხაზეთის მიტროპოლიტი ილია გახდა.

1977 წლის 23 დეკემბერი  ქართველი ერის ისტორიაში უმნიშვნელოვანესი თარიღია. ამ დღეს სიონის საპატრიარქო ტაძარში გამართულმა საქართველოს სამოციქულო ეკლესიის XII ადგილობრივმა კრებამ განიხილა კათოლიკოს-პატრიარქის არჩევის საკითხი, რის შემდეგაც მიტროპოლიტი ილია ერთხმად აირჩიეს საქართველოს კათოლიკოს პატრიარქად. ორი დღის შემდეგ, 25 დეკემბერს, სვეტიცხოვლის საპატრიარქო ტაძარში ახლადარჩეული კათოლიკოს-პატრიარქის კურთხევა მოხდა. ამ პერიოდში შეიძლება ითქვას, რომ ეკლესიას მრევლი არ ჰყავდა. კომუნისტების რეჟიმის პერიოდში ტაძარში წირვას ათიოდე ადადმიანი თუ ესწრებოდა. და აი ამ პირობებში მოხდა საოცრება, კათოლიკოს-პატრიარქის აღსაყდრების დღეს სვეტიცხოველის ტაძარი და მისი ეზო ხალხით გაივსო. უწმინდესმა და უნეტარესმა ამ დღეს წარმოთქვა სიტყვები: ,,ვიდრე ვცოცხლობ, მუდამ ჩემს თვალწინ იქნება ის უხილავი და მაინც ხილული ტახტი, რომელზეც მეუფის ძლიერმა მარჯვენამ ამიყვანა. ჩემს გულზე წარუშლელად წერია ის მოვალეობანი, რომელნიც მისმა უსაზღვრო მოწყალებამ დამაკისრა."

გავიდა ჩვენი პატრიარქის უწმინდესისა და უნეტარესის ილია II- ის აღსაყდრებიდან 34 წელი. ჩვენ მის მიერ გაკეთებული უამრავი საქმიდან მხოლოდ მცირედს გავიხსენებთ.

1990 წელს უწმიდესისა და უნეტარესის ილია II-ის ხანგრძლივი და დაუღალავი შრომის შედეგად, მსოფლიო საპატრიარქომ მიანიჭა მტკიცების სიგელი, რომელმაც დაადასტურა, რომ საქართველოს უწმიდესი ეკლესია ავტოკეფალურია უძველესი დროიდან. კათოლიკოს-პატრიარქის მოღვაწეობის პერიოდში საქართველოს ეკლესიის წმიდათა დასს მრავალი წმიდანი შეემატა. 1988 წელს მისი უწმიდესობის თაოსნობით მცხეთის სასულიერო სემინარია თბილისში გადმოიტანეს, რის საფუძველზეც თბილისის სასულიერო აკადემია და სემინარია დაარსდა. საუკუნეთა შემდეგ კვლავ აღდგა გელათის სასულიერო და მეცნიერებათა აკადემიები. საქართველოს სხვადასხვა კუთხეში გაიხსნა მრავალი სასულიერო სასწავლებელი, გიმნაზიები, სხვადასხვა საერო უნივერსიტეტებში დაარსდა საღვთისმეტყველო კათედრები, სადაც ლექციებს კითხულობენ თბილისის სასულიერო აკადემიის კურსდამთავრებულნი. უწმიდესისა და უნეტარესის ლოცვა-კურთხევით თანამედროვე ქართულ ენაზე გამოიცა ბიბლია, საღვთისმეტყველო კრებული, გამოდის საეკლესიო ჟურნალ-გაზეთები, საეკლესიო კალენდრები, საღვთისმეტყველო წიგნები. საპატრიარქოსთან შეიქმნა მისიისა და ევანგელიზაციის, ხალხური რეწვის, საგარეო-ეკონომიკური, საფინანსო-სამეურნეო, სიწმიდეთა მოძიების, სოფლის მეურნეობის, ჯანმრთელობის დაცვისა და სოციალური უზრუნველყოფის განყოფილებები, პრესცენტრი, ხუროთმოძღვრების, საეკლესიო გალობის აღდგენისა და შემსწავლელი ცენტრი, სასწავლო კომიტეტი. საპატრიარქოს ბაზაზე დაარსდა საქველმოქმედო ფონდი, რომელიც სოციალურად დაუცველ მოსახლეობას ეხმარება, დაფუძნდა ასევე მოხუცებულთა თავშესაფარი და მოწყალების სახლი. პატრიარქის ლოცვა კურთხევით გაიხსნა ობოლ ბავშვთა სახლები ძეგვში, ბედიანში, ზესტაფონსა და ახალქალაქში, სადაც მზრუნველობამოკლებულ ბავშვებს მრავალ კეთილ ადამიანთან ერთად მონასტრებიც აქტიურად ეხმარებიან. საქართველოს ეკლესიის მეთაურს აქტიური ურთიერთობა აქვს უცხოეთში მცხოვრებ ქართველებთან. კათოლიკოს-პატრიარქის ლოცვა-კურთხევით, საქართველოში გაიხსნა ეკლესიები და მონასტრები, აშენდა ახალი ტაძრები. 34  წლის წინ საქართველოში მხოლოდ 48 მოქმედი ეკლესია იყო, დღეს მათი რიცხვი 1000-ზე მეტია. საგრძნობლად გაიზარდა საქართველოს ეპარქიათა რიცხვიც. კათოლიკოს-პატრიარქი ილია II დაჯილდოებულია კონსტანტინოპოლის, იერუსალიმის, ალექსანდრიის, რუსეთის, ბულგარეთის, სერბეთის და თითქმის ყველა მართლმადიდებელი ეკლესიის უმაღლესი ჯილდოთი. ნიუ-იორკის სასულიერო აკადემიამ კი უწმინდესსა და უნეტარესს ღვთისმეტყველების დოქტორის წოდება მიანიჭა. სრულიად საქართველოს კათოლიკოს-პატრიარქის ლოცვა-კურთხევითა და ღვაწლით თბილისში აშენდა ყოვლადწმინდა სამების სახელობის საპატრიარქო ტაძარი, როგორც ქართველი ერის ღვთისაკენ სინანულით მოქცევის სიმბოლო. მისივე თაოსნობით სულ ახლახანს შეიქმნა,,საქართველოს იმედის" საოცარი ხატი, რომელზეც მსოფლიო წმინდანებთან ერთად 400-მდე ქართველი წმინდანია გამოსახული და რომელიც უკვე იქცა ქართველი ერის მფარველობის, იმედისა და  საქართველოს გაერთიანების სიმბოლოდ.  ჩვენი ერის სულიერ მამას,  სრულიად საქართველოს კათოლიკოს პატრიარქს, მცხეთა თბილისის მთავარეპისკოპოსსა და ბიჭვინთისა და ცხუმ-აფხაზეთის მიტროპოლიტს უწმინდესსა და უნეტარეს ილია II-ს დღეს 79 წელი შეუსრულდა. საქართველოს საპატრიარქო ტელევიზია ,,ერთსულოვნება" ულოცავს ჩვენს პატრიარქს დაბადების დღეს,

 ჯანმრთელობას, სულიერ მხნეობასა და დიდხანს სიცოცხლეს უსურვებს.